अकोलेत स्पर्धा परीक्षार्थी व महाविद्यालयीन विद्यार्थ्यांसाठी अभ्यासिका उभारणी अंतिम टप्प्यात

अकोले शहरात स्पर्धा परीक्षा व महाविद्यालयीन शिक्षण घेणाऱ्या विद्यार्थ्यांसाठी महत्त्वाची शैक्षणिक सुविधा उभारली जात असून, विधानपरिषदेचे नाशिक पदवीधर मतदारसंघाचे आमदार सत्यजित तांबे यांच्या आमदार निधीतून सुमारे ७५ लाख रुपये खर्चाची आधुनिक अभ्यासिका सध्या प्रगतीपथावर आहे.

ही अभ्यासिका अकोले नगरपंचायतीच्या पाणीपुरवठा कार्यालयाजवळील शाहुनगर–इंदिरानगर परिसरात उभारली जात आहे. अकोले तालुक्यातील अनेक विद्यार्थी स्पर्धा परीक्षा तसेच उच्च शिक्षणासाठी सातत्याने अभ्यास करत असतात. मात्र अभ्यासासाठी योग्य, शांत व सुसज्ज जागेअभावी त्यांना अडचणींचा सामना करावा लागत होता. ही गरज लक्षात घेऊन अभ्यासिकेची संकल्पना राबवण्यात आली आहे.

अभ्यासिका पूर्ण झाल्यानंतर विद्यार्थ्यांना अभ्यासासाठी स्वतंत्र वाचन जागा, शांत वातावरण आणि आवश्यक मूलभूत सुविधा उपलब्ध होतील. त्यामुळे स्पर्धा परीक्षा तयारी करणारे विद्यार्थी तसेच महाविद्यालयीन विद्यार्थी यांना स्थानिक पातळीवरच दर्जेदार अभ्यास सुविधा मिळणार आहे.

सध्या अभ्यासिकेचे काम अंतिम टप्प्यात असून, लवकरच ते पूर्णत्वास जाण्याची शक्यता आहे. अभ्यासिका सुरू झाल्यानंतर अकोले शहरासह ग्रामीण भागातील विद्यार्थ्यांना मोठ्या प्रमाणात फायदा होणार असून, शिक्षणाला पूरक पायाभूत सुविधा बळकट होण्यास मदत होईल. शिक्षणाच्या दृष्टीने अकोलेसाठी हा उपक्रम महत्त्वाचा मानला जात आहे.