अकोले येथे ३० डिसेंबर ला ‘ग्राहक राजा’ दरबारात तक्रारींची थेट सुनावणी

अकोले | प्रतिनिधी

अकोले तालुक्यातील नागरिकांच्या विविध तक्रारींचे तात्काळ निराकरण करण्यासाठी मंगळवार, ३० डिसेंबर रोजी अकोले येथे ‘ग्राहक राजा’ या विशेष लोकशाही दरबाराचे आयोजन करण्यात आले आहे. या दरबारामध्ये शासकीय व निमशासकीय विभागांशी संबंधित प्रलंबित तक्रारींवर थेट सुनावणी घेऊन त्यांचा निपटारा करण्यात येणार आहे.

ग्राहक दिनानिमित्त आयोजित या दरबारात रेशन कार्ड, वीज वितरण, शिक्षण विभाग, पाणीपुरवठा, आरोग्य, महसूल, ग्रामपंचायत, नगरपंचायत, अन्न व नागरी पुरवठा विभाग यांच्यासह विविध विभागांशी संबंधित तक्रारी स्वीकारल्या जाणार आहेत.

कोणत्या तक्रारींवर होणार सुनावणी?

या दरबारामध्ये खालील प्रकारच्या तक्रारींवर प्रामुख्याने सुनावणी होणार आहे —

शिधापत्रिका, आधार कार्ड, उत्पन्न व रहिवासी प्रमाणपत्र
वीज बिल, पाणीपुरवठा, सार्वजनिक बांधकाम विभाग
शाळा, महाविद्यालय, विद्यार्थ्यांशी संबंधित समस्या
आरोग्य सेवा, विमा योजना
ग्रामपंचायत, नगरपंचायत कार्यालयीन अडचणी
कृषी, बियाणे, खत, पीकविमा व शेतकरी प्रश्न
बँक, विमा, दूरसंचार व ग्राहक फसवणूक प्रकरणे

नागरिकांना आवाहन

या विशेष ‘ग्राहक राजा’ दरबारात तालुक्यातील नागरिकांनी आपल्या तक्रारी संबंधित कागदपत्रांसह उपस्थित राहून मांडाव्यात, असे आवाहन आयोजकांकडून करण्यात आले आहे. एकाच ठिकाणी अनेक विभागांचे अधिकारी उपस्थित राहणार असल्याने नागरिकांच्या समस्या थेट आणि तात्काळ मार्गी लागण्यास मदत होणार आहे.

हा उपक्रम सामान्य नागरिकांसाठी मोठा दिलासा देणारा ठरणार असून, शासकीय कामकाजातील अडथळे दूर करून पारदर्शक व जलद सेवा देण्याच्या दृष्टीने महत्त्वाचा उपक्रम मानला जात आहे.