अकोले शहर परिसरात बिबट्यांचा वावर वाढला
अकोले / प्रतिनिधी :
अकोले शहर परिसरात बिबट्यांचा वावर वाढल्याने नागरिकांमध्ये भीतीचे वातावरण निर्माण झाले आहे. शहरातील अनेक घरांच्या बाहेरील CCTV कॅमेऱ्यांमध्ये बिबटे कैद झाल्याचे स्पष्टपणे दिसून आले आहे. विशेषतः वृंदावन कॉलनी आणि विश्रामगड कॉलनी या भागांमध्ये रात्री सुमारे ९ वाजण्याच्या सुमारास बिबट्याचे दर्शन झाल्याची माहिती समोर आली आहे.
CCTV फुटेजमध्ये बिबटे रस्त्यावरून फिरताना, घरांच्या परिसरात दबक्या आवाजात वावरताना दिसून येत असून, या दृश्यांमुळे नागरिकांमध्ये दहशत पसरली आहे. काही ठिकाणी नागरिकांनी घराबाहेर पडणे टाळले असून, लहान मुले आणि वृद्ध नागरिकांच्या सुरक्षिततेबाबत चिंता व्यक्त केली जात आहे.
स्थानिक नागरिकांनी सांगितले की, अलीकडच्या काही दिवसांत बिबट्यांचा वावर वारंवार दिसत असून, रात्रीच्या वेळी बाहेर पडणे धोकादायक ठरत आहे. पाळीव प्राण्यांनाही धोका निर्माण झाला असल्याचे नागरिकांचे म्हणणे आहे.
दरम्यान, या घटनेची माहिती वनविभागाला देण्यात आली असून, बिबट्यांचा बंदोबस्त करण्यासाठी तातडीने उपाययोजना कराव्यात, अशी मागणी नागरिकांकडून होत आहे. परिसरात गस्त वाढवावी, पिंजरे लावावेत तसेच नागरिकांना सतर्कतेच्या सूचना द्याव्यात, अशी अपेक्षा व्यक्त करण्यात येत आहे.
वनविभागाकडून लवकरच आवश्यक कारवाई करण्यात येणार का, याकडे अकोले शहरवासीयांचे लक्ष लागले आहे.
About The Author
